Compréhension de lecture : Louta et le pipon — Louta e piponik

Kiwetinok itekera micta sipik Saint-Laurent ka icinikatek, otananik mictikok ka micta kicteritakositcik Nitaskinak, pakiciniw kon ka ici matanak. Matce sokispon akam sipik, aci kata piponiw ka ici taciketcik aneki Matana ka icirakaniwitcik. Kisinariw e kicepawonik, rakasimonik pe otci orowiapiteriw akwapiteriw, waskok icamakaniw, miro nokoniw e capo reacterik ka ici akwapiterik. Kakakewa ka airikasiritci taci akosiriwa micta ocpimik sesekatikok, itapiriwa nete warowik… kitoriwa. Kaaa! Tekaci nama petakonipan kekociciriw ekoni tekaci ospawemaritci ka niparispana.

E taci wikwekitc omikoni wapowan, itapiw Nikikw-iskwe (ickwecic ka nikikowitc), tekaci waiariw kaie makatewariw ockicikw, kanawapatam e wasewarik. Micta mireritam, pasikopataw mina nitinam opakekineskisina ka micta kicowarik ka taci wepapikeparinik okitc octikwanik. E ickwa witcihikotc otcotcoma e piskak omaskisin, omitcikawina otapinew, peikwaw pakwemew pakwecikanicica ka miniciritci, orowipataw. Micta kisinariw mitowi maskomia ka otci takisiritci, wirini ko nte ka nikipitewotcinaniwok ekoni e otci kisinarik. Micta aric wesa mireritam kaie kicteritam e nta aikotatc nahwe Nikikw-iskwe, nama nisitamatcitaw e micta kisinarik, micta pakahaniw otehi e micta mireritak.

Aci mi tipiskariw, notcimik icawok Matana ka icirakaniwitcik, tekaci nama petakoniw kekociciriw. Petakosiriwa kona e pimasamotetcik, mia e nakamoritci. Pecotcik nanosanehitowok, okomoma nikaniteriwa Nikikw-iskwe, nosanetawok e meskanakeritci, takociniwok ka ici acterik nictam nakwakaniriw, nama ki otci nakwatamawok! Nac iti ponikweriw Nikikw-iskwe, atoweritcikew, wapamiko okoma e kackeritak, itiko kitci pehotc. E piponik, tekaci wapisiwok wapocak aka kitci ki makonakaniwitcik kitci miro papirotowatcik ka wi makonikotcik. Patima ka nictoniwonik nakwakaniriw ekoni ka nakwatamatc wapoca Nikikw-iskwe. E wapamatc anihi wapoca erikam kirawe itapiw. Kowetowi iterimo mireritam kaie kockwapamo. Nama wi matciw e koctak kitci mowikotc anihi wapoca ka ki nakwatamatcik. Erowek aric e tacikeritci okoma. Pekatc witcihew osima e maninaritci wapoca.

Kanawapamew osima nahwe kokominac, sokitcitcew nahwe kokominac, pekatc takinew otitamanirik osima e cowerimatc. Nisitotakosiw e cowimikweritc e arimwetc, itew osima kitci itaritci mikwetc wapoca e ki mireritci opimatisiwiniw wirawaw otci, mikwetc kitcotcono aski e ki pe mirikoikw kaskina kekociciriw. E koski kiwetcik omatakaniwak, kanawapatam Nikikw-iskwe e taci oterik wapoc napanewaporiw kaie kaskina wec ka aicinakonik e masinactetinik rakasimonekinik. Kaskina wec aiteritam erotc otci mamitonerimew okoma. Mikwetc e ki pe mirikoian kitci okomian ke pakitanamowitc kiskeritamowiniw notcimik e pimatisinaniwonik, nokomak kaie nimocomak ka ki miwotatcik.