Compréhension de lecture : Louta et le sikon — Louta e sikonik

Aci mitceto kicokaw esko ka ickwa piponik. Ki pe tipickam nikikocic Louta, ki niarano tato piponesiw. Nikos icinikasoriwa otatama, Marie Matana (Montagne) icinikasoriwa otcotcoma, nama tariwa octesa, omisa kaie ocima, nama aric wec iteritam, nama iterimo mia nircike. Witci tacikemew kaskina ka sakihatc, mitowi ka ki ici pimatisiritci omocomiwaw kaie okomiwaw. Mia pisimwa e sikonik ko ekote kaskina e ici wapamatcik awaca, mireritamowiniw petariwa.

Aci sakasikeriwa pisimwa, takickakowok e kicasikeritci. Aci iti kiconamiriwa askiriw aci kata nti sikoniw. Aci cakikaminiw onawis kaie aci kisinariw, mirwatcitawok e kicowarik. Kwei kwei sikon! Ninan Atikamekok e sikok, actew kitci icaiak kotakik ka ici actek nimatakaniminan, ka ici irinatikoskak kaie ka ici wikwasatikoskak ekote e icaiak tatwaw e sikok. Ni pictasamenan, kitci ki miro icaiak nitaskinak.

Micta kinec motewok Atikamekok awasite sakihikanik kaie sipik, kiapatc ka mackowakotinik. Micta icpakonakariw kiapatc atamatikok, akawacteciniriwa kona nama tca nac sosoriwa, nama tapwe kata ki kicimotewok. Pe orowiapateriw kiapatc akwapiteriw rakasimonik ka ki ici nta piponicitcik, nama aric aci tananiwoniw. Nama wotc aci tacikewok Matana ka icirakaniwitcik. Erowek aric tekaci e nokonik askik taci e ki ici icatcik. Nete itekera ici atimaskanawewok matanak. Ekote arimatc ke icananiwok!

Kek nikotin e kicepawonik, ki kisina tipiskariw, nokoniw akwapiteriw waskok, mia e nimimakanik. Pacitc irinatikok, ekote kekat kaskina e taciketcik. Wirctam Marie wapamew mamitcitc ka takociniritci, icitcitceriw otonik e wapataratc aka kitci kitoritci e petcimoteritci. Nama iteritamopan Louta wipatc kitci takociniritci, ka wapamatc maka micta waiapariniw ockicikw mitowi tcohanicica e wasisoritci ekoni e icinakonik ockicikw. Micta mireritam wirini mikonoweciw, wicamew Louta kitci pe icaritci.

Micta motekoreriw okotowaniwaw mia e nakamomakanik. Taci apiw Louta ka ki ici anaskaniwonik, kanawapamew owitcicana, nama kito. Micta kicteritam ka ki ici mirakaniwitc opimatisiwinik. Nama wiskat wi onikew, nama kata onikew wikwamotariw ka ki apatcitatcik kitci mawotcitatcik irinatikwaporiw, nama kaie kata onikatew askikwa ka ki ici micta oterik irinatikwaporiw, nama kaie kata onikew e ki micta miromakonik, micta mireritam.

Omocoma nehirowimoriwa « Mikwetc ohe mitcim kaie mikwetc mantewok kaie tca micta kitci mikwetc ke pe mitciiak nanake » mitowi e aiamiharitci. Mikwetc itew Kice Manitowa e ki mirikotcik mitcimiriw. E mikawerimatcik kewirawaw omocomiwaw kaie okomiwaw kaie e kicterimatcik, itew osima nahwe kice iriniw kitci motcictewepinaritci pakwecikana kaie wiasiriw ka ki wikwekinamotcik wikwasik.

E ickwa micta miro mitcisotcik, kaskina pasikoparihowok. Ketcinatc arimatc ke pehotcik kitci otakocinik kitci atisoketcik. Aci arimatc kata nta sisipaskotokewok.

E ickwa mawotcitatcik irinatikwaporiw ka micta kictapatanik, ki osamok ickotek micta aric osami kanokoreriw niheriw ickoteriw. Makoneriwa maka omocoma kona mina iciwepineriwa nete askikok kitci sosoritci kaie ickotek kitci ispariritci aka kitci micta kanokorerik. Keskinowapamew omocoma Louta. Ekote e totcikatek aka kitci micta kanokorek ickote.

Kitci ki kiskeritakik kecpin aci e mirwacinik osisipaskotokaniwaw, otapanam mocom emikwaniw ka micta kinowaskonik kaie ka pokoneckarik. Wir ka ki mokotatc niheriw emikwaniw, mokotakaniw ki apatcitaw. Actaw niheriw emikwaniw cotorok mina atewakaminikew mina mininam. Pecotcik otonik itinam, potatam. E potatak opikowia mi tariwa ekoni et pakapariritci... pak! Nama moci mirwaciniw arimatc kata petawok aka kitci micta mocakaminik.

E ickwa kictatcik osisipaskotokaniwaw, sikinamok konik mi mackowariw enko pikiwosikan ka icinikatakaniwitc. Tohanicica ka micta sisiritci wecihewok e apitc tca wikatciciritci nama kinec tekaci iskamowok nehi tohanicica ka micta sisiritci. Micta mireritam Louta itactamictowew mictikwa, mikwetc itew omanitomiwa e ki pe mirikotcik kitci micta wikactamatcik, nehirowi mitcimiriw. Micta kicteritakon nehe e sisipaskotokaniwok.

Micta kicteritam nahwe kokom e kackitaritci osima mikwetc e iteritci. Enko arimatc e totcikatek e kicteritcikatek e ki ici mirikoikw kaskina ka aitakoki notcimik, ka kictapataki. Arimatc kata kicteritamiriwa e pe wasikeritci pisimwa e piponik kaie tipiski pisimwa e wactenamakotcik e tipiskarik, miro wapatamok omeskanamiwaw. Enkoriw ka mawotci kictapatanik ka ki ici mirikotc onikihikwa, omocoma kaie okoma nahwe nikikocic.